Қазақстандық маман Ұлттар лигасының ойынына делегат болып сайланды

Қазақстан футбол федерациясының операциялық директоры Александр Кеплин УЕФА әйелдер Ұлттар лигасындағы Венгрия мен Сербия құрамалары арасындағы ойында делегат қызметін атқарады.

Бұл туралы Қазақстан футбол федерациясы хабарлады.

Александр Кеплин 2018 жылдың наурыз айынан бері УЕФА матчтарының делегаты қызметін атқарып келеді. Оның негізгі міндеті – ойынның ұйымдастыру жұмыстарын үйлестіру, инфрақұрылым мен қауіпсіздікті қадағалау. Сондай-ақ, ол матч алдындағы жиындарға төрағалық етіп, оның регламентке сай өтуін қамтамасыз етеді.

Кездесуді бельгиялық төрешілер тобы басқарады. Басты төреші – Каролине Ланссенс, ал оған матч кезінде Мария Этьен мен Мелисса Лейеар көмектеседі.

Айта кетейік, аталған ойын 4 сәуірде, Қазақстан уақытымен 23:55-те, Венгрияның Дьёр қаласындағы «Дьирмот» стадионында өтеді.