Мейірім Нұрсұлтановтың менеджері: Карлос Адаместе таңдау мүмкіндігі аз

Қазақстандық боксшы және WBC рейтингінің бірінші нөмірі Мейірім Нұрсұлтановтың менеджері Эгис Климас орта салмақтағы WBC чемпионы Карлос Адамеспен жекпе-жек өткізу шарттары туралы пікір білдірді, деп хабарлайды Sport12.kz

Бұған дейін Дүниежүзілік бокс кеңесі (WBC) Доминикан Республикасы өкілі, орта салмақтағы чемпион Карлос Адамеске (24-1-1, 18 КО) қазақстандық Мейірім Нұрсұлтановқа (20-0, 11 КО) қарсы жекпе-жек өткізуді міндеттеген болатын.

«Бұл жекпе-жектің өту ықтималдығы жоғары. WBC ресми үміткерді бекітті. Енді Адаместің үш таңдауы бар: біріншісі – Мейірімге қарсы міндетті қорғау жекпе-жегін өткізу, екіншісі – барлық белбеулер үшін Жәнібекпен біріктірілген жекпе-жекке шығу, үшіншісі – титулдан өз еркімен бас тарту. Басқа жол жоқ», – деді Климас.

Сондай-ақ, Эгис Климас Мейірім Нұрсұлтанов пен Карлос Адамес жекпе-жегінің Қазақстанда өту мүмкіндігін бағалады.

«Адамес Қазақстанға келуге келісе ме? Оған аса ықыласты емес шығар. Бірақ мүмкін. Нақты айта алмаймын. Мен үйге қайтып, келіссөздер жүргіземін. Бізде 6 мамырға дейін уақыт бар», – деп қосты Климас.

Айта кетейік, Мейірім Нұрсұлтанов соңғы жекпе-жегін 2023 жылдың қарашасында өткізіп, чилилік Хулио Аламосты төрешілердің шешімімен жеңген болатын.