EURO-2025: Қазақстан қыздар құрамасы екінші ойында жеңілді

Футболдан Қазақстан 19 жасқа дейін қыздар құрамасы 2025 жылғы Еуропа чемпионаты іріктеу кезеңінде екінші ойынын Косовоға қарсы өткізді.

Кездесу барысында қазақстандық Жансезім Айсапар есеп ашқан еді. Дегенмен ел құрамасы екінші таймда жауапсыз екі гол өткізіп алды. Ойынның 89-минутында қорғаушы Карина Ботабек екінші сары қағаз алып, алаңнан қуылды.

Осылайша қарсыласына 1:2 есебімен есе жіберіп, екінші мәрте жеңілістің ащы дәмін татты.

Айта кетсек, бұдан бұрын олар Латвияға 1:3 есебімен ұтылып қалды. Біздің құрамадан Адина Бейбіт гол соқты.

Енді олар 7 сәуірде Мальтамен шеберлік байқасады.

Әрбір топта бірінші орын алған құрамалар алдағы маусымда А лигасында бақ сынайды. Сондай-ақ Польшада өтетін финалдық кезеңге қатысуға ммүмкіндік алады.

Қазақстандық футболшылар бірінші іріктеу кезеңінде Румыния мен Латвиямен 0:0 есебімен тең ойнаса, Лихтенштейннен 7:0 есебімен басым түсті.