Қазақстан жасөспірімдер құрамасы Малайзияда сәтті ойын көрсетті

Кучингте (Малайзия) 14 жасқа дейінгілер арасында жасөспірімдер әлем чемпионаты – World Junior Tennis Competition 14&Under Азия – Тынық мұхит аймағы бойынша іріктеу турнирі мәресіне жетті.

Бұл жөнінде Қазақстан теннис федерациясы мәлім етті.

Қазақстан құрамасы топтық бәсекеден сенімді өтіп, ширек финалда Корея Республикасы командасымен кездесті. Матч тартысты өтіп, қыздарымыз 1:2 есебімен жеңіліс тауып, өкінішке қарай, әлем чемпионатының финалдық кезеңіне өте алмады. 

Дегенмен команда 5-8 орындар үшін ойындарда нағыз күрескерлік рухты көрсете білді. Әсіресе, 5-орын үшін кездесуде турнирдің мықты құрамаларының бірі – Аустралияны 2:1 есебімен тізе бүктірді.

Бұл қазақстандықтардың бір апта ішінде Аустралиямен матчтағы екінші жеңісі еді. Бұдан бұрын біздің спортшыларымыз топтық кезеңде де мықтылық танытқан еді. Мұндай нәтиже – Аустралия теннисінің деңгейін ескерсек, үлкен нәтиже. 

Құрамында Ясмин Дүйсембаева, Тәмина Сәкен, Мәриям Нұржан бар Қазақстан құрамасы (капитаны Марат Шәріпов) бізде талантты да еңбекқор ұрпақ өсіп келе жатқанын тағы да дәлелдеді. Қыздар тек шеберліктерін көрсетіп қана қоймай, кортта күш-қайратын да таныта білді. 

Осы табыс үшін бапкерлерге, ата-аналарға және барлық командаға рахмет. Бұл жолы финалдық кезеңге бір қадам жетпей қалды, дегенмен Кучингте алынған тәжірибе болашақ жеңістер үшін міндетті түрде берік негіз болатыны анық.