Ұлттар лигасы: Қазақстан әйелдер құрамасы қатарынан екінші матчта жеңіске жетті

Футболдан әйелдер арасындағы Ұлттар лигасының 4-туры аясында Қазақстан құрамасы Арменияны тізе бүктірді.

Елордадағы «Астана Арена» стадионында өткен кездесуде қазақстандық футболшы қыздар қарсыластарын 3:2 есебімен жеңді.

Ұлттар лигасы. С тобы, 4-тур.

Қазақстан (Ә) – Армения (Ә) – 3:2

Голдар: 48' Бибосынова (1:0), 55' Бибосынова (2:0), 63' Давтиан (2:1), 66' Давтиан (2:2), 71' Айтымова (3:2)

Осылайша, ел құрамасы турнирдегі 7-ші ұпайын олжалап, өз тобында екінші орынға көтерілді. Бұған дейін отандастарымыз Лихтенштейнді ірі есеппен жеңіп (4:0), Люксембургпен (2:2) тең түссе, Арменияға (0:2) есе жіберген еді.

Енді Айтпай Жамантаев пен Мадияр Кембілов жаттықтыратын ұлттық құрама келесі ойынды өз алаңында, Лихтенштейнге қарсы өткізеді. Бұл кездесу 30 мамырға жоспарланған.