Rising Stars XI басылымы: Дастан Сәтпаевтан да мықты

Танымал еуропалық Rising Stars XI басылымы 16 жастағы қазақстандық шабуылшы Дәулет Орынбасар жайлы арнайы жазба жариялап, оның әлеуетін жоғары бағалады.

Басылым ойыншыны тіпті «Челси» клубымен келісімшартқа отырған Дастан Сәтпаевпен салыстырып, Орынбасардың нәтижелері одан асып түскенін атап өтті.

– Дәулет Орынбасар — QJ League тарихындағы ең көп гол және нәтижелі пас берген ойыншы. Ол 17 матчта 28 гол соғып, 14 ассист жасады. Ол бұл көрсеткіштерімен «Челси» клубымен келісімшартқа отырған Дастан Сәтпаевтың өзінен де озып кетті. Нағыз вундеркинд, – делінген жазбада.

Өткен маусымда Дәулет QJ League-ның 17 жасқа дейінгі санатында үздік ойыншы және сұрмерген атанды. «Қайраттың» болашағынан үміт күттіретін жас жұлдызы 17 матчта 28 гол, 14 нәтижелі пасымен дараланды.

Сонымен қатар, Дәулет 17 жасқа дейінгі ұлттық құрама сапында да еркін көсіліп ойнады. Беларусьте өткен «Даму кубогында» Иранға қарсы шешуші голды соғып, Ресеймен өткен кездесуде матчтың үздік ойыншысы атанды. Дәл осы ойыннан кейін, отандасымызға мәскеулік ЦСКА клубы қызығушылық танытты деген қауесет пайда болған еді.

Оның ұлттық құрамадағы жетістігі мұнымен шектелмейді. Еуропа чемпионатының іріктеу кезеңінде Грузиямен өткен кездесуде екі гол соғып, бір нәтижелі пас берді. Ал Литвамен болған матчта тағы бір гол мен бір ассистің авторы атанды.