Мұхаммед Салах «Ливерпульде» қалады

Мысырлық шабуылшы Мұхаммед Салах «Ливерпульмен» келісімшартын ұзартты.

Клубтың баспасөз қызметінің хабарлауынша, қос тарап 2027 жылдың жазына дейін жарамды келісімшартқа қол қойды.

Салах мерсисайдтық клубқа 2017 жылы Италияның «Рома» командасынан ауысып келді. Осы уақыт ішінде 32 жастағы шабуылшы 394 матч өткізіп, 243 гол соғып, әріптестеріне 111 нәтижелі пас берді.

«Қызылдар» сапында Салах жалпы саны 8 трофейге қол жеткізді. Атап айтқанда, ол «Ливерпульмен» бірге Ағылшын Премьер-лигасы, Чемпиондар лигасы, Англия кубогы мен Суперкубогы, Лига кубогы (2 мәрте), сондай-ақ УЕФА Суперкубогы мен Клубтар арасындағы Әлем чемпионатында топ жарды.

Айта кетейік, нидерланд бапкері Арне Слот баптайтын «Ливерпуль» Ағылшын Премьер-лигасының биылғы маусымында 31 ойында 73 ұпай жинап, турнир кестесінде көш бастап келеді.