Заңсыз көлікті иемденген: «Қайраттың» бұрынғы бапкерінің басы дауға қалды

Ресейлік банк алматылық «Қайрат» клубының бұрынғы бас бапкері Александр Кержаковтың көлігін тартып алмақ.

«Зенит» банкі Кержаковтың иелігіндегі Audi Q3 маркалы көлікті өндіріп алғысы келеді. Бұл көлік бастапқыда Ресей азаматы Сергей Петуховқа тиесілі болған. Ол көлікті сатып алу үшін аталған банктен 1,5 миллион рубль көлемінде несие алып, оны кепілге қойған. Алайда несиені өтей алмай, банктің алдындағы берешегі 6,7 миллион рубльге дейін өскен. Соған қарамастан, Петухов банкті ескертпестен көлікті Кержаковқа сатып жіберген.

Осыған байланысты айыптаушы сотқа жүгініп, көлікті тәркілеп, оны ашық саудаға шығаруды сұрап отыр. Сонымен қатар, Кержаковтан 30 мың рубль көлеміндегі мемлекеттік салықты өтеуді талап етуде.

Айта кетейік, Ресей құрамасының бұрынғы шабуылшысы Александр Кержаков 2024 жылдың мамыр айында «Қайрат» клубының тізгінін ұстап, қыркүйек айында қызметінен кеткен болатын.