Рафаэль Оразбахтин: Чемпиондық команданың бұлай ойнауға хақысы жоқ

«Қайрат» футбол клубының бас бапкері Рафаэль Оразбахтин «Атырауға» қарсы ойында ірі есеппен жеңіске жеткенімен, командасының ойынына көңілі толмағанын мәлімдеді.

Бұл туралы ол матчтан кейінгі баспасөз мәслихатында айтты.

– Ойын алдында қойған жоспарды алғашқы 10-15 минуттың ішінде орындап тастадық. Есеп 2:0-ге жеткенде команда босаңсып қалды. Матч соңына қарай қарсыластарымыз біздің қақпаға бірнеше қауіпті шабуыл ұйымдастырды. Ойыннан кейін жігіттерге чемпиондық деңгейдегі команданың бұлай ойнауға хақысы жоқ екенін ескерттім. Біз өз деңгейімізді үнемі ұстап отыруымыз керек. Алдағы уақытта мұндай оқылықтар қайталанбайды деп үміттенемін, – деді Рафаэль Оразбахтин.

Еске салсақ, алматылық «Қайрат» Қазақстан Премьер-лигасының 4-туры аясында өткен кейінге шегерілген матчта «Атырауды» 4:0 есебімен ойсырата жеңді. Алматыдағы Орталық стадионда өткен кездесуде алаң иелері сапынан Дастан Сәтпаев, Еркін Тапалов, Александр Мартынович және Жоржиньо мергендігімен көзге түсті.