Қазақстанда жаңа футбол клубы құрылды

Қазақстан футбол федерациясының кәсіби клубтар арасында жарыстар өткізу дирекциясының басшысы Бақытжан Пазылхайыр «Жайық» футбол клубының құрылғанын мәлімдеді.

Бұл туралы ол «Nursultan Qurman» Youtube-арнасына берген сұхбатында айтты.

– Батыс Қазақстан облысының әкімдігі «Жайық» футбол клубын құру идеясын қолдады. Енді «Ақжайық» футболшылары аталған командаға ауысып, клуб ойыншылар алдындағы берешегін толық өтейді. Жаңа футбол клубы Қазақстанның екінші лигасында доп тебетін болды,– деді Бақытжан Пазылхайыр.

Еске салсақ, жыл басында облыс басшылары қаржылық қиындықтарға тап болған «Ақжайық» футбол клубының орнына жаңа команда құратынын мәлімдеген болатын. Енді бұл жоба облыс әкімдігінің қолдауына ие болып, жаңа клуб құрылатын болды.