Футболдан ұлттық құраманың келесі жұлдызы кім болады?

Қазақстан футбол федерациясы президентінің кеңесшісі Нұрсұлтан Құрман ұлттық құраманың болашақ көшбасшылары жайлы пікір білдірді, деп хабарлайды Sport12.kz.

— Маған «Оқжетпестің» ойыны ұнайды. Жылдамдығына тіпті камера да ілесе алмай қалады. Олар «Астананың» негізгі құрамына қарсы тамаша ойын көрсетті. Сол ойында гол соққан жігіт туралы қазір бәрі айтып жүр.

Сондай-ақ, «Қайрат» пен «Атырау» арасындағы матчта Әділет Садыбековтың ойынға қосылуын көрдік. Егер ол бабына келсе, құраманың орталық алаңындағы мәселелі позицияны жауып бере алады, — деді Нұрсұлтан Құрман.

Айта кетейік, Қазақстан кубогының 1/8 финалында «Оқжетпес» пен «Астана» кездесіп, негізгі уақыт 1:1 есебімен аяқталған еді. Пенальти сериясында «Астананың» жолы болды (8:7). Ал 26-минутта көкшетаулық шабуылшы Алияр Мұхамед есеп ашқан болатын.