Исламбек Қуат ұлттық құрамаға орала ма?

Қазақстан футбол федерациясы президентінің кеңесшісі Нұрсұлтан Құрман Исламбек Қуаттың ұлттық құрамаға шақырытылуы мүмкін екенін айтты.

Оның сөзінше, 32 жастағы жартылай қорғаушының ойыны бас бапкер Әли Әлиевтің көңілінен шығады.

– Қуаттың «Астанадан» «Жеңіске» ауысқаны дұрыс болды. Қазір «Жеңістің» ішкі атмосферасы оңалғаны туралы сөз етіліп жатыр. Командада сенімділік, ерік-жігер пайда болған. Мен Қуаттың құрамаға шақырылуы жайлы, бас бапкер Әли Ханалиұлымен сөйлескенмін. Ол «көреміз» деді. Бұған дейін Дастан Сәтпаев туралы айтқанымда да дәл осындай жауап қайтарған. Сондықтан, Қуат құрамаға шақырылса таң қалмаңыздар. Егер «Жеңісте» өзін жақсы қырынан көрсетсе, міндетті түрде оған мүмкіндік беріледі, – деді Нұрсұлтан Құрман.

Айта кетейік, Исламбек Қуат Қазақстан ұлттық құрамасы жейдесінде 64 ойында өткізіп, 6 рет мергендігімен танылған.