«Аңыздар ойыны»: Қазақстан және әлем құрамасы тең түсті

 Қазақстан футболы күніне орай әлем және Қазақстан футболының аңыз ойыншылары кездесуі аяқталды, деп хабарлайды Sport12kz.

Бұл матч 25 сәуір - Қазақстан футболының күніне орай ұйымдастырылып отыр. Оған Қазақстан футбол федерациясының қолдау білдірді.

Кездесу басынан қазақстандық футболшылардың белсенділігі байқалып тұрды. Қарсылас құрама қақпасы маңында жиі бой көрсетті. Осындай сәттердің бірінде шабуылшы Мұрат Тілешев португалдық қақпашы Витор Байядан айласын асыра алған жоқ.

Есесіне көп ұзамай қазақстандық футболшылар өз қақпасына гол жіберіп алды. Оны испаниялық Гаи́ска Мендье́та өзінің еншісіне жазды.

Екінші кезеңде отандастарымыз таразы басын теңестіруге ұмтылды. Нәтижесінде Азат Нұрғалиев өз мүмкіндігін мүлт жіберген жоқ. Ол тағы бір сәтте мергендігін танытып, өз құрамасын алға шығарды.

Одан кейін Давид Лория қорғаған Қазақстан футболының аңыздары құрамасы қақпасына пенальти белгіленді. Оны болгариялық бұрынғы шабуылшы Димитр Бербатов шебер орындай білді.

Осылайша жолдастық кездесу 2:2 есебімен тең аяқталды.

Айта кетсек, аталған кездесуге әлем аңыздары сапында Витор Баия (Португалия), Марко Матерацци (Италия), Хавьер Дзанетти (Аргентина), Кристиан Дзаккардо (Италия), Дуглас Майкон (Бразилия), Джей-Джей Окоча (Нигерия), Димитар Бербатов (Болгария), Сержиньо (Бразилия), Клод Макелеле (Франция), Халилу Фадига (Сенегал), Кларенс Зеедорф (Нидерланд), Эстебан Камбьяссо (Аргентина), Гаиска Мендьета (Испания), Фернандо Морьентес (Испания) келді.