Симоне Индзаги: кейінгі 8–9 жылда Ламин Ямаль сияқты ойыншыны көрмедім

«Интер» клубының бас бапкері Симоне Индзаги Чемпиондар лигасының жартылай финалында «Барселонамен» өткен алғашқы матчтан (3:3) кейін каталондықтардың жас жартылай қорғаушысы Ламин Ямальға баға берді, деп хабарлады Sport12.kz

17 жастағы испаниялық футболшы осы ойында бір гол соқты.

– Кейінгі сегіз-тоғыз жылда Ламин Ямальдай футболшыны көрмеген шығармын. Оны тоқтату үшін үш ойыншыны қарсы қоюға мәжбүр болдық. Әрине, мұндай тактикалық шешімнен кейін «Барселонада» бос кеңістіктер пайда болды. Бірақ сол сәттен бастап Ямальдың ойыны аздап бәсеңдеді. Ал біз екінші таймды өз пайдамызға шештік, – деді Индзаги Movistar телеарнасына берген сұхбатында.

Айта кетейік, Ламин Ямаль Чемпиондар лигасының жартылай финалында гол соққан ең жас футболшы атанды. Ол осы көрсеткіш бойынша бұрынғы рекорд иесі Килиан Мбаппені («Монако» сапында) басып озды.