Ламин Ямаль «Барселонадағы» мерейтойлы матчын өткізді

17 жастағы вингер Ламин Ямаль «Барселона» сапындағы мерейтойлы 100-ші матчын өткізді, деп хабарлайды Sport12.kz.

Испаниялық вундеркинд түнеугүні өткен «Интерге» (3:3) қарсы Чемпиондар лигасының жартылай финалы аясындағы ойында каталондық клуб жейдесіндегі 100-ші матчында алаңға шығып, мерейлі межені бағындырды.

Ямаль бұл кездесуде жасының кішілігіне қарамастан, алаңда шебер ойын көрсетті. 24-минутта қарсылас қорғаушыларын айналып өтіп, Ян Зоммер қорғаған қақпаны дәл көздеп, есеп айырмасын 1:2-ге дейін қысқартқан еді. Алайда матч 3:3 есебімен тең аяқталды.

Еске салсақ, Ламин Ямаль үлкен футболдағы алғашқы ойынын 2023 жылдың 29 сәуірінде «Бетиске» (4:0) қарсы өткізген болатын. Содан бері «блауграналықтар» құрамында 22 гол мен 33 ассист жасап, Испания құрамасының негізгі ойыншысы ретінде Еуропа чемпионы атанып үлгерді.