Еуропа лигасы: «Манчестер Юнайтед» сырт алаңда жеңіске жетті

Бүгін, 1 мамырда футболдан UEFA Еуропа лигасы жартылай финалындағы алғашқы ойындар өткізілді, деп хабарлайды Sport12.kz.

Жарыстың аталған сатысындағы кездесудің бірінде «Атлетик Бильбао» (Испания) мен «Манчестер Юнайтед» (Англия) шеберлік байқасты. 

Кездесу барысында англиялық клубтың белсенділігі байқалып тұрды. Нәтижесінде олардың қатарынан Каземиро 30-минутта есеп ашса, 37-минутта Бруну Фернандеш пенальтиден мүлт кеткен жоқ.

Ойынның 45-минутында Бруну Фернандеш тағы бір мәрте мергендік танытып, кездесудің нүктесін қойды.

Осылайша англиялық клуб қарсыласынан сырт алаңда 3:0 есебімен басым түсті.

Сондай-ақ тағы бір кездесуде «Тоттенхэм Хотспур» (Англия) мен «Бодо-Глимт» (Норвегия) ойнады.

Аталған матчта «Тоттенхэм Хотспур» жылдам гол соғып үлгерді. Олардың қатарынан Бреннан Джонсон 1-минутта қақпа торын тулатса, 34-минутта Джеймс Мэддисон есепті үстемелей түсті. 

Тағы бір голды Доминик Соланке 61-минутта пенальтиден енгізсе, норвегиялық команда сапынан Ульрик Салтнес 83-минутта жалғыз голмен жауап қайырды.

Англиялық команда қарсыласын 3:1 есебімен басым түсті.

Енді қарымта кездесу 8 мамыр күні өткізіледі.