Жанкүйерлер қақтығысынан бір адам көз жұмды

Италиялық футбол жанкүйері «Аталанта» мен «Интер» фанаттары арасындағы қақтығыс салдарынан көз жұмды, деп хабарлайды Sport12.kz.

Жантүршігерлік оқиға Италияның Бергамо қаласында орналасқан спорт барының маңында тіркелді. Қаза тапқан адамның есімі – Риккардо Кларис. 26 жастағы марқұм «Аталанта» клубының жанкүйері болған. Оған пышақ сұққан «Интер» фанаты – 19 жастағы Якопо Де Симеоне. Якопо тұтқындалып, істеген ісін мойындап отыр. Ол полицияға берген түсініктемесінде ағасын қорғау мақсатында қолына суық қару алғанын растады.

Айта кетейік, «Аталанта» кеше «Монцаға» қонаққа барып, 4:0 есебімен алаң иелерін ойсырата жеңді. Италия А Сериясының 35-туры аясында өткен кездесу Риккардо Кларисті еске алу үшін бір минуттық үнсіздікпен басталды.