«Реалдың» жаңа бас бапкері белгілі болды

«Байер» футбол клубының бас бапкері, испаниялық маман Хаби Алонсо мадридтік «Реалдың» тізгінін ұстайды, деп хабарлайды Sport12.kz.

Белгілі инсайдер Фабрицио Романоның мәліметінше, қос тарап 2028 жылдың жазына дейін жарамды келісімшартқа қол қойған. Журналист өз сөзінде Алонсоның «Реалды» осы жазда өтетін Клубтар арасындағы әлем чемпионатына бастап баратынын атап өтті.

Айта кетейік, осыған дейін Хаби Алонсо «Байерден» маусым соңында кететінін ресми хабарлаған еді. 43 жастағы бапкердің жетекшілігімен леверкузендік клуб өткен маусымда Германия чемпионы атанып, Ел кубогын иеленген болатын.

Ал «бланкостың» қазіргі тәлімгері Карло Анчелотти бапкерлік мансабын Бразилия ұлттық құрамасында жалғастырады деген қауесет бар. Италиялық маманның тұсында корольдік клуб биылғы маусымда бірде-бір трофейге қол жеткізе алмады.