Сон Хын Мин өзін бопсалаған әйелге айып тақты

Футболдан Оңтүстік Корея құрамасы мен «Тоттенхэм» клубының шабуылшысы Сон Хын Мин 20 жастағы әйелді бопсалау әрекеті үшін айыптады, деп хабарлайды Sport12.kz.

Күдікті әйел мен оның сыбайласы Сеулде құрықталды. Бүгінде жергілікті құқық қорғау ұйымы тергеу жұмыстарын жүргізіп жатыр.

Футболшының заңгерлік тобы күдікті 2024 жылдың маусым айында Сон Хын Миннен жүкті екенін жалған айтып, бұл жайлы тіс жармау үшін ірі көлемдегі ақша талап еткенін мәлімдеді. Дереккөзге сенсек, сұралған қаражат көлемі ондаған миллион оңтүстіккореялық вонды (ондаған мың АҚШ доллары) құраған.

Қазіргі уақытта полиция бұл іске қатысы бар адамдардан жауап алуда.

Айта кетейік, Сон Хын Мин «Тоттенхэм» намысын 2015 жылдан бері қорғап келеді. 32 жастағы ойыншы биылғы маусымдағы 40 ойында 10 гол соғып, әріптестеріне 12 нәтижелі пас берді.