«Қайрат» футзал клубын Оңтүстік Америка чемпионы бапкер басқармақ

Футзалдан «Қайрат» клубы бразилиялық маман Даниэл Жуниорды жаңа бас бапкер етіп тағайындады, деп хабарлайды sport12.kz.

Санта-Катарина штатының Тубарау қаласында туған Даниэл Жуниор ойыншы ретіндегі мансабын «Унисул» клубында бастаған. 2006 жылы алаңдағы өнерін аяқтаған соң, сол клубта бапкер көмекшісі ретінде қызметке кірісті. Кейін «Ульбра» командасында ассистент болып, 2009 жылдан бастап дербес түрде бірнеше бразилиялық клубты басқарды: «АБК», «Шашьенсе», «Мафра», «Капивари» және «Жоинвилле».

Оның жетекшілігімен командалар Санта-Катарина мен Парана штаттарының чемпионаттарында бірнеше рет жеңіске жетіп, жүлделі орындар иеленді. Сонымен қатар, жасөспірімдер арасында Бразилия кубогын қоса алғанда, ұлттық турнирлерде де табысқа жеткен. Бұдан бөлек, Жуниор Бразилияның жасөспірімдер құрамасын жаттықтырып, олармен бірге Оңтүстік Америка чемпионатында және Жасөспірімдер Олимпиада ойындарында чемпион атанды.

Айта кетейік, биыл маусым айында клуб 2023 жылдан бері «Қайратты» жаттықтырған испан маманы Марлон Веласкомен қош айтысқан еді.

Біздің серіктес: 200 000 фрибетті ұтысқа саламыз – арнаға жазыл және батырманы бас