Қазақстан футбол федерациясы өзбекстандық әріптестеріне алғысын білдірді

Футзалдан әлем чемпионаты аяқталғаннан кейін Қазақстан футбол федерациясы өзбекстандық әріптестеріне алғысын білдірді.

«Естен кетпес ерекше Әлем чемпионатын ұйымдастырған Өзбекстан еліне зор алғысымызды айтамыз. ФИФА-ның Орталық Азияда ұйымдастырған алғашқы ресми жарысын Ташкент, Әндіжан және Бұқара қалалары қабылдады. Баршамыз тарихи сәттің куәсі болдық. Бауырлас елдің ыстық қолдауы да біздің жүрегімізде мәңгі сақталады! Katta rahmat!», - деп жазылған ҚФФ таратқан хабарламада.

Қазақстан биыл әлем чемпионатында D тобында Испаниямен 1:1 есебімен тең ойнаса, одан кейін Ливияны 4:1, Жаңа Зеландияны 10:0 есебімен тізе бүктірді. Нәтижесінде өз тобында Испанияны алға жіберіп, екінші орын алды.

Одан кейін 1/8 финалда Португалияны 2:1 есебімен жеңіп, ширек финалға шықты. Ал ширек финалда Аргентинаға 1:6 есебімен есе жіберді.