Кака Әбдірәсіл Әбдіманапұлы туралы: Спортқа мұндай салғырт қарап көрмеппін

Футзалдан Қазақстан құрамасының бас бапкері Пауло Рикардо Кака Әбдірәсіл Әбдіманапұлының не себепті ұлттық құрамаға шақырылмай жүргенін түсіндірді.

Бұл туралы ол Nursultan Qurman YouTube арнасына берген сұхбатында айтты.

— «Семейге» ауысқалы бері Әбдірәсілдің әлем чемпионатында көрсеткен деңгейін байқай алмадым. Құрамаға шақыртылмай тұрып, ол үйлену тойына байланысты «Каспийдің» екі матчына қатысқан жоқ. Мен де кезінде футболшы болдым, бірақ спортқа мұндай салғырт қарау туралы ешқашан ойламаппын. Егер бұл шұғыл отбасылық жағдай немесе денсаулығына байланысты мәселе болса, түсіністікпен қарауға болар еді. Әркімнің өз таңдауы бар. Бәлкім, футзал оның өміріндегі ең басты нәрсе емес шығар. Сондықтан да ол қазір ұлттық құраманың сапында жоқ, — деді Кака.

Айта кетейік, Әбдірәсіл биылғы маусымда «Семей» сапында 24 матчқа қатысып, 4 гол соқты.