Футзалдан Қазақстан жастар құрамасы Португалиядан жеңіліп қалды

Футзалдан Қазақстанның 19 жасқа дейінгі жастар құрамасы 2025 жылғы Еуропа чемпионатының іріктеу кезеңіндегі екінші ойынын Португалияға қарсы өткізді. 

Кездесу барысында португалиялық құрамадан Афонсу Моуринья (14, 33-минутта) екі гол соқса, тағы бір голды Леонилду Балде 38-минутта пенальтиден енгізді.

Оған қазақстандық Семен Тарасенко 32-минутта пенальтиден бір голмен жауап берді.

Осылайша жастарымыз қарсыласына 1:3 есебімен есе жіберіп қойды. Олар бұдан бұрын дәл осындай есеппен Францияға жол берген еді.

Екі ойыннан кейін ұпай ала алмаған қазақстандық жастар құрлықтық дода финалдық кезеңіне берілетін жолдамадан құр қалды. Оны Португалия мен Франция өзара сарапқа салады. Екеуі де алғашқы екі турда ұпай жоғалтқан жоқ. 

Енді отандастарымыз ерте, 30 наурызда Беларусьпен шеберлік байқасады.