Қазақстан құрамасы әлсіз қарсыластарынан да жеңіле бастады

Бүгін футзалдан Қазақстан ұлттық құрамасы жолдастық кездесуде Вьетнамнан жеңіліп қалды.

Жанкүйерлер бүгінгі ойынның басты фавориті ретінде Қазақстан құрамасына сенім білдірген еді. FIFA рейтингінде қазақстандық футзалшылар жетінші орында тұрса, Вьетнам отыз бірінші орынға жайғасқан. 

Соған қарамастан вьетнамдықтар жоғары деңгейде ойын көрсете білді. Олар 14-минутта есеп ашса, Ержан Карменов 32-минутта таразы басын теңестірді.

Ойынның соңғы екі минутында ел құрамасы өз қақпасынан үш гол алып шығуға мәжбүр болды. Оның біреуі 39-минутта қақпаға енсе, екеуі 40-минутта соғылды.

Кездесуде қазақстандық футзалшылар қарсыласына 1:4 есебімен есе жіберді.

Енді олар аталған қарсыласымен 15 сәуірде тағы бір мәрте жолдастық кездесу өткізеді.

Соңғы уақытта Қазақстан құрамасы кез келген қарсыласынан жеңіліп қалып жүр. Тіпті Еуропа чемпионатына іріктеу кезеңінде де өз тобында да екінші орын алып, құрлықтық додаға шығу мүмкіндігін біршама қиындатып алды.

Айта кетсек, кездесуге дайындық 8 сәуірде Астанада басталды. Оған 14 ойыншы қатысты.