«Қайрат» футзал клубының легионері өзге клубқа кетеді

АФК «Қайраттың» легионері, бразилиялық футзалшы Денер жазғы трансферлік терезеде алматылық клубтан кетеді, деп хабарлайды Sport12.kz.

Relevo басылымының мәліметінше, ойыншыны Испанияның әйгілі «Эль-Посо Мурсия» клубы өз құрамына қоспақ. Денердің «Қайратпен» келісімшарты әлі бір жылға жарамды болса да, испандық клуб оның трансфері үшін 34 000 еуро көлемінде өтемақы төлейді.

Келісім бойынша, бразилиялық ойыншы жаңа клубымен екі жылдық келісімшартқа қол қоймақ.

Айта кетейік, «Қайрат» пен «Эль-Посо» арасындағы келіссөздер УЕФА футзал Чемпиондар лигасының «Төрттік финалы» барысында өткен. Аталған турнирдің финалында алматылық клуб Испанияның «Пальма» командасынан 4:9 есебімен жеңілген болатын.