«Тактика тұрғысынан қателестік»: «Қайрат» футзал клубының президенті жеңілістің себебін түсіндірді

Футзалдан «Қайрат» клубының президенті Қайрат Оразбеков Чемпиондар лигасы финалындағы «Пальмаға» қарсы ойынға қатысты пікір білдірді, деп хабарлайды Sport12.kz.

– Менің ойымша, бұл ойында тактикалық тұрғыда қателік кетті. «Картахенаға» қарсы матчтағыдай, бізге екінші нөмірмен ойнаған тиімді болар еді. Алайда «Пальманың» ойын стиліне бейімделіп, олардың алаңында Луанға жоғары прессинг жасағанымыз дұрыс шешім болмады. Бұл қателік бізді бірінші таймның соңында екі голмен жазалады. Осы сәттен кейін ойын тізгінін қайта қолға алу қиынға соқты. Сонымен қатар, Чемпиондар лигасын екі мәрте жеңіп алған қарсылас 12 ойыншысын кезектестіріп қосып отырғанда, біз бар-жоғы 8 ойыншымен жоғары прессинг ұйымдастыруға тырыстық. Егер дәл осы тактиканы таңдаған болсақ, біз де толық құраммен ойнауға тиіс едік,– деді Қайрат Оразбаев.

Еске салсақ, «Қайрат» УЕФА Чемпиондар лигасының финалында испаниялық «Пальмаға» 4:9 есебімен ойсырай жеңілген болатын. Финалдық кездесуде алматылық ұжым сапынан Кайо Руис, Дәурен Тұрсағұлов, Жахангир Рашид және Кевин Аррьета гол соғып, көзге түсті.