Қазақстан футзал құрамасы бразилиялық легионерінен айырылуы мүмкін

Алматылық «Қайрат» футзал клубының ойыншысы, Қазақстан құрамасының мүшесі Эдсонға португалиялық «Бенфика» клубы ресми трансферлік ұсыныс жасады, деп хабарлайды Sport12.kz

Эдсон «Қайрат» сапында 2018 жылдан бері ойнап келеді. 2020 жылы ол Словенияның «Лития» клубына жарты жылға жалға берілген болатын. Кейіннен қайта Алматыға оралды.

Алайда ойыншының Еуропаға ауысуы Қазақстан құрамасындағы болашағына әсер етуі мүмкін. ФИФА ережесіне сәйкес, спорттық азаматтықты ауыстыру үшін, ойыншы ел аумағында үздіксіз бес жыл тұруы тиіс. Эдсонның Словенияға жалға берілуі бұл мерзімді үзіп жіберген. Осыған байланысты есептеу қайтадан 2020 жылдың қыркүйегінен басталған. Егер трансфер сол мерзімнен бұрын жүзеге асса, ойыншы Қазақстан құрамасында ойнау құқығынан айырылуы мүмкін.