4 сағат бұрын
ҚХЛ: «Барыстың» жаңа маусымға дайындық жоспары белгілі болды
Фото: «Барыс» хоккей командасы
Елордалық «Барыс» командасының жаңа маусым алдындағы дайындық жоспары белгілі болды, деп хабарлайды Sport12.kz.
Оқу-жаттығу жиынының негізгі бөлігі Астана қаласында өтеді. Алдымен медициналық комиссия тексеруінен кейін екі жақты келісім-шартқа қол қойған хоккейшілер 15 шілдеден бастап дайындыққа кіріседі. Ал 1 тамыздан бастап бір жақты келісім-шартқа қол қойған хоккейшілер олардың қатарына қосылады.
Елордалық команда 26-29 тамыз аралығында Ресейдің Магнитогорск қаласындағы халықаралық «Иван Ромазан мемориалы» турниріне қатысады.
Ал 1 және 2 қыркүйек күндері елордада «Барыс Аренада» Ресейдің «Сибирь» командасымен бақылау ойынын өткізеді.
Сондай-ақ 3-6 қыркүйек аралығында Құрлықтық хоккей лигасының 2025-26 жылғы маусымына соңғы дайындық болады. Чемпионаттың тұрақты кезеңінің басталуы 7 қыркүйекке белгіленген. Бұл күні елордалық команда Ресейдің «Трактор» (Челябі) командасын қабылдайды.
