«Барыс» - 25 жыл: Командалық рекордтар

«Барыстың» 25 жылдық мерейтойын атап өтуіне санаулы күндер қалды. Бұл жөнінде команданың баспасөз қызметі клуб тарихындағы ең маңызды деректер мен оқиғаларды ұсынады.

Құрлықтық хоккей лигасындағы 17 маусымда «Барыс» 12 рет плей-офф кезеңіне шықты және үш мәрте Чернышев дивизионының жеңімпазы атанды. Астаналық команда үш рет Гагарин Кубогының екінші кезеңінде бақ сынады.

93 – «Барыс» бір тұрақты чемпионат көлемінде еншілеген ең көп ұпай саны. ҚХЛ-да үш ұпайлық жүйе болған 2014-2015 жылдар маусымында астаналықтар 60 матчтың 24-інде негізгі уақытта, екі рет овертаймда, төрт ойында буллиттер сериясы нәтижесінде жеңіске жеткен. Тағы 9 ойында командамыз қосымша уақытта қарсыласына есе жіберіп, ұпай еншіледі.

«Барыс» тарихындағы ең нәтижелі тұрақты маусымда жалпы 190 шайба соққан. Бұл үшін қазақстандық ұжымға 2018-2019 жылдар маусымының 62 ойыны қажет болды.

Құрлықтық хоккей лигасындағы ең ірі жеңісіне «Барыс» 2013 жылдың 8 қыркүйегінде қол жеткізді. Сол күні Ари-Пекка Селин бастаған біздің командамыз өз айдынында «Северстальді» 10:1 есебімен жеңді. Матчта Брэндон Боченски мен Найджел Доус екі шайбадан соқты. Команданың қазіргі ойыншылары Роман Старченко мен Михаил Рахманов сол ойында өз есептеріне бір шайбадан жазған.

«Барыстың» Лигадағы ең нәтижелі ойыны 2009 жылы 4 қаңтарда өтіп, «Витязьбен» матчта қазақстандық ұжым жеңімпаз атанған (11:6). Сол кездесуде Константин Глазачев пен Геннадий Столяров қарсылас қақпасына екі шайбадан соққан еді.

«Медвешчак» командасымен 2015 жылдың 5 желтоқсанында өткен ойында «Барыс» 7 секундтың ішінде екі шайба соқты. Найджел Доус пен Брэндон Боченски нәтижелі соққылардың авторы атанды. Бұл – клуб тарихында ең жылдам соғылған голдар.

Жылдам үш гол соғылған «Салават Юлаевпен» матч әлі де көптің есінде (05.09.2017). Ол кезде «Барыс» таразы басын теңестіріп, 46 секундтың ішінде қарсылас қақпасына үш шайба соғып, матчтың соңғы минутында жеңісті жұлып алған.

«Барыстың» туған күніне орай, 24 қарашада «Авангардпен» матчта Қайрат Нұртас өнер көрсетеді.

Матч алдындағы шоу сағат 16:00-де басталады. Аренадағы өз орныңызды тауып, жайғасу мақсатында ертерек келуіңізді сұраймыз.