Pro Hokei Ligasy: «Сарыарқа» автоматты түрде қола жүлдегер атанды

Хоккейден Қазақстан чемпионатының қола жүлдесі үшін өтуі тиіс ташкенттік «Хумо» мен қарағандылық «Сарыарқа» арасындағы кездесу болмайтын болды.

Pro Hokei Ligasy регламентіне сәйкес (8-бөлім, 42-баптың 10 және 11-тармақтары) ел чемпионатының жүлделеріне тек отандық клубтар ғана ие бола алады. «Хумо» біріншілікке Өзбекстан атынан қатысқаны үшін, үздік үштіктің қатарынан көріну мүмкіндігінен айырылды.

Осылайша, қола жүлде сарапқа салынуы тиіс болған «Хумо»  мен «Сарыарқа» арасындағы матч өткізілмейді. Нәтижесінде, қарағандылық ұжым Қазақстан чемпионатының қола жүлдегері атанды.

Айта кетейік, Pro Hokei Ligasy финалында «Арлан» (Көкшетау) мен «Торпедо» (Өскемен) шеберлік байқасады. Төрт жеңіске дейін ұласатын ақтық серияның алғашқы кездесуі 7 сәуір, Көкшетау қаласында өтеді.