Қазақстандық Олимпиада чемпионы елге оралады

Дзюдодан Олимпиада чемпионы, күміс және қола жүлдегері Елдос Сметов Қазақстанға оралады, деп хабарлайды Sport12.kz.

Сметов 2025 жылдың 9-11 мамыр аралығында Астанада өтетін Qazaqstan Barysy Grand Slam турниріне арнайы қонақ ретінде қатысып, ұлттық құрама спортшыларына қолдау білдіреді.

Соңғы уақытта Елдос Сметов отбасымен бірге Англияда тұрып, тіл меңгерумен айналысқан еді. Енді ол елге оралып, спорттық жаттығуға қайта кірісуді көздеп отыр.

Айта кетейік, алты құрлықтың 400-ден аса дзюдошысы бақ сынайтын айтулы Qazaqstan Barysy Grand Slam турнирі 9-11 мамыр аралығында Астанадағы Жақсылық Үшкемпіров атындағы жекпе-жек сарайында өтеді. Жанкүйерлер дүбірлі доданы трибунадан тегін тамашалай алады.

Елдос Сметов – қазақстандық дзюдошы, халықаралық дәрежедегі спорт шебері. Париж XXXIII Олимпиадасының жеңімпазы, Рио-де-Жанейрода өткен ХХХІ жазғы Олимпиадасының күміс жүлдегері, Токиода өткен ХХХІІ жазғы Олимпиадасының қола жүлдегері. Әлем чемпионы (Астана, 2015 жыл), Жастар арасындағы Әлем Чемпионы (2010 жыл), Азия Чемпионы (Ташкент, 2016 жыл), Халықаралық «Grand Prix» турнирінің үш дүркін жеңімпазы, Жастар арасындағы Азия чемпионатының қола жүлдегері (Бангкок, 2013 жыл), Азия ойындарының жеңімпазы (Инчхон, 2014 жыл).