Елдос Сметов болашақ ізбасарын көрсетті

Дзюдодан Олимпиада чемпионы Елдос Сметов болашақта өз ізін жалғайтын ұлын көрсетті, деп хабарлайды Sport12.kz

Қазақстандық спортшы Instagram-stories парақшасында кішкентай ұлының дзюдоға деген қызығушылығын бейнелейтін әсерлі видеомен бөлісті. Бейнежазбада үйдегі теледидарда дзюдо турнирі көрсетіліп жатқан сәт көрініс табады. Сол уақытта Сметовтің ұлы, экрандағы жекпе-жектен шабыттанып, өз «кездесуін» бастайды. Қарсыласы ретінде жұмсақ жастықты таңдап, түрлі әдіс-тәсілдермен күреседі.

Балақайдың қимыл-қозғалысы мен құлшынысы жанкүйерлерді тәнті етті. Ол нағыз спортшыға тән жігермен күресіп, ақыры қарсыласын «жеңіп», қолын жоғары көтеріп, жеңіс қуанышын көрсетеді.

Еске салсақ, Елдос Сметов — әлем чемпионы, Олимпиада ойындарының жүлдегері және Қазақстандағы ең танымал дзюдошылардың бірі.