Көшпенділер ойындарының ашылу салтанатын журналистер «Қазмедиа орталығынан» тамашалайды 

 5-ші Дүниежүзілік көшпенділер ойындарының ашылу рәсімі кезінде 8 қыркүйек күні сағат 16:00-ден бастап «Қазмедиа орталығы» орталық баспасөз орталығы жұмыс істейтін болады. 

Халықаралық стандарттарға сай аталмыш баспасөз орталығында Ашылу салтанатынан тікелей эфир көрсетіледі және БАҚ өкілдері «Астана Арена» стадионында өтетін Ашылу салтанатына қатыспайды. 5-ші Дүниежүзілік Көшпенділер ойындарына тіркелген БАҚ өкілдері үшін «Қазмедиа орталығындағы» баспасөз орталығындағы жұмыс алаңына кіру «Киноконцерттік зал» (Қазақ радиосы көшесінің бойы) жағынан жүргізіледі. Тіркелген журналистер нысандарға тек аккредитациямен (бейдж) кіргізіледі. 

Сонымен қатар, 5-ші Дүниежүзілік көшпенділер ойындары барысында «Қазмедиа орталығындағы» баспасөз орталығымен қоса«Қазанат» ипподромында, Ж. Үшкемпіров атындағы жекпе-жек сарайында, «Алау» мұз айдынында және «Думан» кешенінде арнайы баспасөз орталықтары жұмыс істейтін болады. 

Этноауылда шағын пресс-орталық ретінде жабдықталған киіз үй жұмыс істейді.