Александр Зуев Қазақстан құрамасының алдағы ойындарына қатыспайды

Қазақстан құрамасының бас бапкері Магомед Адиев командаға жаңадан қосылған Александр Зуевтің алдағы ойындарға қатыса алмайтынын айтты.

«Зуев біздің елдің төлқұжатын алғандықтан, оны ұлттық құрамаға үміткер ретінде қарастырып жатырмыз. Иә, ол жаттығу барысында жарақат алып, екі ойынға қатыса алмайды. Сондықтан, жарақатынан айығып, командамен бірге чемпионатқа дайындықты бастау үшін оны осында қалдыру туралы шешім қабылданды. Келесі іріктеу ойындары келгенде, әрине, оны тағы да қарастырамыз», - деді Адиев Sport24 сайтына берген сұхбатында.

Еске салайық, Қазақстан құрамасы 17 және 20 маусым күндері Еуро-2024 іріктеу кезеңі аясында Сан-Марино және Солтүстік Ирландия құрамаларына қарсы екі кездесу өткізеді.

Маусым айының басында Зуев Қазақстан төлқұжатын алған еді. Бірнеше сағаттан кейін ҚФФ ресми сайтында футболшының Қазақстан құрамасына шақырылғаны туралы ақпарат жарияланды.