Қазақстан қысқы Олимпиадаға қай брендтің киімін таңдайды?

Қазақстан Республикасының туризм және спорт министрі Ербол Мырзабосынов халықаралық Under Armour бренді елдің олимпиадалық құрамасын спорттық киіммен қамтамасыз ететінін айтты, деп хабарлайды Sport12.kz

Жиынтыққа жазғы және қысқы форма, сондай-ақ ашық ауада жаттығуға арналған экипировка кіреді. Брендті таңдау кезінде спортшылардың пікірі ескерілді.

«Спортшы үшін форма өте маңызды. Бұл тек жаттығу киімі ғана емес, сонымен қатар спортшылар жарыстарда өнер көрсететін жарыс формасы», – деп түсіндірді ол.

Бұған дейін Қазақстан құрамасының жазғы олимпиадалық спорт түрлері бойынша спортшыларына тек жазғы форма, ал қысқы олимпиадалық спорт түрлері бойынша спортшыларына тек қысқы форма ғана берілетін.

«Бұл өте қолайсыз болды. Жазғы спорт түрлерінің спортшылары қыста, шынын айтқанда, тиісті экипировкасыз қалатын. Бүгін біз бұл мәселені шештік. Жиынтықта 20-дан астам өнім бар. Жазғы және қысқы форма. Сондай-ақ Under Armour-дан жарысқа арналған экипировка сатып аламыз. Ал салтанатты форма мен спортшылар марапаттау рәсіміне шығатын киімді отандық бренд тігеді. Сатып алу бюджеттен тыс қаражат есебінен жүзеге асырылады», – деп нақтылады министр.

Спортшыларды жабдықтау үшін Nike, Adidas, Kelmi және отандық компанияларды қоса алғанда, көптеген фирмалар қарастырылды. Брендті таңдауда спортшылардың ұсыныстары ескерілді.

«Егер егжей-тегжейін айтсақ. Мысалы, биатлонда мылтық сапасыз болса, бұл жалпы нәтижеге әсер етеді. Мұнда біз үшін ең бастысы – сапа мен нәтиже. Бұл спортшылар 10–15 жастан бастап жаттығып, осындай биіктерді бағындырып келеді. Егер дәл форма салдарынан жеңіліп қалсақ, бұл өте өкінішті болар еді», – деп атап өтті Ербол Мырзабосынов.

Еске сала кетейік, Қазақстан құрамасы Италияда өтетін Олимпиада ойындарында 10 спорттық дисциплина бойынша 58 медаль жиынтығы үшін бақ сынайды.

Біздің серіктес: Бізге тіркел!