Волейбол: Қазақстан құрамасы Ұлттар кубогының жартылай финалына шықты

Волейболдан Қазақстан әйелдер құрамасы Вьетнамда өтіп жатқан AVC Ұлттар кубогындағы жеңісті сериясын жалғастырды, деп хабарлайды Sport12.kz.

Турнирдегі төртінші кездесуінде Қазақстан Иранды тізе бүктірді. Бұл матчта волейболшыларымыз 3:1 (25:14, 25:18, 22:25, 26:24) есебімен жеңіске жетті.

Осылайша отандастарымыз дүбірлі додадағы төртінші жеңісіне қол жеткізіп, мерзімінен бұрын жартылай финалға жолдама алды. Бұған дейін Ришат Гилязутдинов шәкірттері қарсылас шақ келтірмей, Жаңа Зеландия (3:0), Моңғолия (3:1) және Индонезиядан (3:0) басым түскен еді.

Турнирдің барлық ойынында жеңіске жетіп, 12 ұпай жинаған ұлттық команда B тобында жеке дара көш бастап тұр.

Енді ел құрамасы жарыстағы келесі матчын ертең, 12 маусым күні Филиппинге қарсы өткізеді.