Астана қаласында «Болашақ ойындарын» қабылдайтын спорт нысандары анықталды

Туризм және спорт вице-министрі Серік Жарасбаевтың мәлімдеуінше, Астана қаласы 2026 жылы 18 шілде мен 1 тамыз аралығында өтетін фиджитал-спорт бойынша үшінші халықаралық «Болашақ ойындарының» ресми иесі ретінде таңдалды.

Аталған турнир физикалық спорт түрлері мен цифрлық технологияларды біріктіретін 13 бірегей дисциплинаны қамтиды. Қатысушылар фиджитал-футбол мен баскетбол, виртуалды вело және автожарыстарда, киберспорттық шутерлерде, дрон-гонкаларда және өзге де инновациялық бағыттарда бақ сынайды.

Ойындар Астананың жетекші спорт және инфрақұрылым нысандарында өтеді, олардың қатарында:

• «Қазақстан» спорт кешені
• «Барыс Арена»
• «Сарыарқа» велотрегі
• Жақсылық Үшкемпіров атындағы «Жекпе-жек» сарайы
• «Алау» мұз сарайы
• «Beeline Арена», Конгресс-орталық және Инклюзивті спорт орталығы бар.

Айта кетейік, «Болашақ ойындары» алғаш рет 2024 жылы Қазанда, кейін 2025 жылы Дубайда өткен болатын.