13 сағат бұрын
Көркем гимнастикадан Қазақстан құрамасы Румыниядағы турнирге қатысады
Фото: Қазақстан ҰОК
Көркем гимнастикадан Қазақстан құрамасы 25-27 шілде аралығында Румынияның Клуж-Напока қаласында өтетін World Challenge Cup турнирінде бақ сынайды, деп хабарлайды Sport12.kz.
Қазақстан Ұлттық Олимпиада комитетінің хабарлауынша, беделді бәсеке Халықаралық гимнастика федерациясының (FIG) күнтізбесіне енгізілген. Оған 42 елден 200-ге жуық спортшы қатысады. Дүбірлі додада еліміздің атынан сегіз спортшы сынға түседі.
Турнир аясында Айбота Ертайқызы және Айым Мейіржанова жекелей сайыста бақ сынайды. Ал топтық жаттығуда Айда Хәкімжанова, Айзере Кеңес, Жасмин Жүнісбаева, Кристина Чепульская, Айзере Нұрмағамбетова, Мәдина Мырзабай ел намысын қорғайды.
Қазақстандық спортшылар бұған дейін Сингапурда өткен Азия біріншілігінде жарыс жолына шыққан еді. Онда отандастарымыз топтық жаттығуда және жекелей сында 2 алтын, 1 күміс және 2 қола медаль алды.
Сондай-ақ 18-25 тамыз аралығында Бразилияда көркем гимнастикадан әлем чемпионаты өтеді. Бұл жарыс аталған дүбірлі дода алдындағы дайындық ретінде бағаланады.
