Спортты дамыту дирекциясының басшысы 584 млн теңге жымқырған

«Спортты дамыту дирекциясы» РМҚК директорына қатысты тергеу аяқталды. Бұл туралы ҚР Сыбайлас жемқорлыққа қарсы іс-қимыл агенттігінің ресми өкілі Данияр Бигайдаров айтты.

- Сыбайлас жемқорлыққа қарсы қызмет ҚР Туризм және спорт министрлігі Спорт және дене шынықтыру істері комитетінің «Спортты дамыту дирекциясы» РМҚК директоры мен оның орынбасарына қатысты тергеуді аяқтады. Олар кәсіпкерлік субъектілерімен бірлесіп спорт жабдықтарын сатып алу, сондай-ақ туроператорлармен жоғары құн бойынша шарттар жасасу арқылы 584 млн теңге мөлшерінде бюджет қаражатын жымқырды деген күдікке ілінді, - деді ресми өкіл баспасөз конференциясында. 

Сонымен қатар, кәсіпорын директоры жеке компанияның директоры бола тұра, 2021 жылы Батыс Қазақстан облысында футбол мен допты хоккейді дамытуға бөлінген 161,9 млн теңге көлемінде бюджет қаражатын жымқырған.

Қылмыстық-процестік кодекстің 201-бабына сәйкес өзге ақпарат жария етуге жатпайды.