2026 жылғы Олимпиада ойындарына дайындық барысы қалай?

Халықаралық Олимпиадалық комитеті (ХОК) мен 2026 жылғы қысқы Олимпиада және Паралимпиада ойындарын ұйымдастыру комитетінің бірлескен семинары өтті.

Бұл жөнінде қазақстан Ұлттық олимпиада комитеті мәлім етті.

Қазақстан Ұлттық Олимпиадалық комитеті атынан шараға Спорт департаментінің басшысы Бектұр Қиятбай мен Халықаралық қатынастар департаментінің директоры Анар Сыздықова қатысты.

Семинар барысында 78 ҰОК пен 33 Ұлттық Паралимпиадалық комитетінің өкілдері Олимпиада ойындарына дайындық туралы толық ақпарат алды. Атап айтқанда, Олимпиада қалашығы мен қонақүйлердің жағдайы, спорттық нысандардың дайындығы, логистика, әлеуметтік желілерді жүргізу ережелері және қауіпсіздік шаралары талқыланды.

2026 жылғы қысқы Олимпиада ойындары 6-22 ақпан аралығында өтеді деп жоспарлануда. Оған кемінде 3500 спортшы қатысып, 195 медаль жиынтығы сарапқа салынады. Бұл Олимпиада бағдарламасына алғаш рет ски-альпинизм спорты енгізілді.

2026 жылғы Олимпиада Италия тарихындағы төртінші болмақ. Бұған дейін 1956 жылы Кортина-д’Ампеццода, 2006 жылы Туринде қысқы, ал 1960 жылы Римде жазғы Олимпиада ойындарын өткізген.

Милан жарыстардың басты орталығы болады. Мұнда конькимен жүгіру, шорт-трек, мәнерлеп сырғанау және шайбалы хоккей бойынша жүлделер сарапқа салынады.