23 сағат бұрын
ISU рейтингі жаңарды: Михаил Шайдоров үздік үштіктің қатарында

Фото: Maddie Meyer / Staff / Getty Images
Қазақстандық мәнерлеп сырғанаушы Михаил Шайдоров жаңартылған ISU (Халықаралық конькишілер одағы) рейтингінде үшінші орынға жайғасты.
Аталған рейтингтің көшін америкалық Илья Малинин бастап тұр. Жапониялық Юма Кагияма екінші орыннан көрінсе, отандасымыз Михаил Шайдоров үздік үштікті түйіндеп тұр.
2024/25 жылғы маусымның нәтижесіне негізделіп құрастырылған ерлер арасындағы ISU-рейтингі:
- Илья Малинин (АҚШ) - 2700
- Юма Кагияма (Жапония) - 2362
- Михаил Шайдоров (Қазақстан) - 2265
- Адам Сяо Хим Фа (Франция) - 2149
- Шун Сато (Жапония) - 2000
- Кевин Аймо (Франция) - 1869
- Даниэль Грассль (Италия) - 1864
- Ника Эгадзе (Грузия) - 1658
- Лукас Бричги (Швейцария) - 1642
- Маттео Риццо (Италия) - 1600
Михаил Шайдоров биыл төрт құрлық чемпионатында топ жарып, әлем чемпионатының күміс жүлдегері атанды. Одан бөлек Қытайдың Харбин қаласында өткен IX Қысқы Азия ойындарында қола медальға ие болды.
Еске салсақ, осыған дейін Михаил Шайдоровтың биылғы маусымда тапқан табысы туралы жазған болатынбыз.
