Бадминтоншы Дмитрий Панарин Азия чемпионатына жолдама алды

Қазақстандық бадминтоншы Дмитрий Панарин Қытайдың Нинбо қаласында өтіп жатқан Азия чемпионатына іріктеу турнирінде сәтті ойын көрсетіп, сары құрлық додасының негізгі кезеңіне жолдама алды.

Іріктеу турнирі аясында әлемнің 78-ші ракеткасы, 25 жастағы Панарин екі қарсыласын сенімді түрде жеңіп шықты. Отандасымыз алдымен Бангаладеш спортшысы Абдус Соад Хандокарды 2:0 (21:18; 21:6) есебімен тізе бүктірсе, екінші кездесуінде Мьянма өкілі Хейн Хтутаның осал тұсын тапты – 2:0 (21:12; 21:6).

Енді Дмитрий жарыстың 1/16 финалында әлемдік рейтингте 36-орында тұрған үндістандық Киран Джорджбен шеберлік байқасады.