Алдияр Аңсат — Орталық Азия чемпионатының жеңімпазы

Бүгін Алматы қаласында шахматтан Орталық Азия елдері арасындағы чемпионат өз мәресіне жетіп, үздіктер анықталды.

Ерлер арасында турнир толықтай қазақстандық шахматшылардың жеңісімен аяқталды. Алдияр Аңсат барлық қарсыласын артта қалдырып, чемпион атанды. Екінші орынды Сатбек Ахмединов иеленсе, үшінші орынға Әлішер Сүлейменов тұрақтады.

Әйелдер арасындағы тартысты додада 9 тур қорытындысы бойынша Өзбекстан өкілі Афруза Хамдамова жеңіске жетті. Қазақстандық Елназ Қалиахмет күміс жүлдегер атанса, қола жүлдені Меруерт Камалиденова еншіледі.

Аталған чемпионат — FIDE ұйымдастыратын Әлем кубогына тікелей іріктеу турнирі болып табылады. Жарыс қорытындысы бойынша, алғашқы төрт орынды иеленген ерлер мен әйелдер шахматшылар әлемдік додаға жолдама алды.