Милан-2026: Қазақстан қысқы Олимпиадада неше жүлде алады?

Ресейлік «Спорт-Экспресс» басылымы 2026 жылы Италияның Милан мен Кортина-д’Ампеццо қалаларында өтетін Қысқы Олимпиада ойындарының медальдік есебін болжады, деп хабарлайды Sport12.kz

Басылымның жазуынша, болжам жасау барысында 2025 жылы өткен 12 әлем чемпионатының нәтижелері негізге алынған. Тек ерлер мен әйелдер арасындағы хоккей, керлингтегі дабл-микст және мәнерлеп сырғанаудағы командалық жарыс есепке алынбаған. Себебі, олар Олимпиада форматынан едәуір ерекшеленеді.

«Олимпиадада 116 медаль жиынтығы сарапқа салынады. Біздің есептеуіміз бойынша, алтын медальді 19 мемлекет жеңіп алуы мүмкін. Ал жалпы жүлде санына 25 ел ілігеді. Посткеңестік елдер ішінде медальдік тізімге Қазақстан (0 алтын, 2 күміс, 1 қола), Украина (0-1-0) және Латвия (0-1-0) енді», – делінген мақалада.

Бұл болжамға сәйкес, Қазақстан 2026 жылғы қысқы Олимпиадада үш медаль жеңіп алуы ықтимал: екі күміс пен бір қола.