Қазақстандық таеквандошылар Азия чемпионатында 5 жүлде жеңіп алды

Бүгін, 29 сәуірде Қытайдың Уси қаласында таеквандодан клубтар арасындағы ашық Азия чемпионаты жалауын желбіретті, деп хабарлайды Sport12.kz.

Сары құрлық додасының алғашқы жарыс күнінде отандастарымыз ел намысын абыроймен қорғап, 1 алтын, 1 күміс және 3 қола медаль жеңіп алды.

Ерлер арасындағы бәсекеде Бейбарыс Қаблан (+87 кг) күміспен күптелсе, Алтайр Өмірбеков (-74 кг) пен Батырхан Төлеуғали (-80 кг) қола жүлдеге қол жеткізді.

Ал әйелдер арасында Мария Севостьянова (-57 кг) Азия чемпионы атанды. Сондай-ақ, Нодира Ахмедова (-49 кг) ел қоржынын тағы бір қола медальмен толықтырды.

Айта кетейік, клубтар арасындағы құрлықтық чемпионатқа Азияның 14 елінен 219 спортшы қатысып жатыр. Байрақты бәсеке 30 сәуірге дейін жалғасады.