Қазақстандық зілтемірші Әлем чемпионатында қола алды

Қазақстандық зілтемірші Кира Данилова Перудың Лима қаласында өтіп жатқан жасөспірімдер арасындағы ауыр атлетикадан Әлем чемпионатының қола жүлдегері атанды, деп хабарлайды Sport12.kz.

71 келіге дейінгі салмақ дәрежесінде сынға түскен 16 жастағы спортшымыз қоссайыс нәтижесінде 209 келіні (94+115) бағындырды.

Жарыс қорытындысы бойынша, қытайлық Жинвей Лин (231 келі – 100+131) топ жарса, Ресей өкілі Дарья Кузнецова күміспен күптелді (210 келі – 93+117).

Айта кетейік, Данилованың қоласы ел қоржынына түскен бесінші жүлде болып есептеледі. Осыған дейін Бейбарыс Ерсейіт (61 келі) пен Ксения Прозорова (59 келі) алтыннан алқа тақса, Ернұр Мырзахмет (73 келі) пен Ерасыл Сәулебеков (81 келі) қолаға қол созған еді.