Қазақстандық шахматшы Азия чемпионатында топ жарды

Қазақстандық шахматшы Алуа Нұрман Біріккен Араб Әмірліктерінде өтіп жатқан Азия чемпионатында алтыннан алқа тақты, деп хабарлайды Sport12.kz.

18 жастағы Алматы өкілі турнир барысында 6 партия қатарынан жеңіске жетті. Спортшымыз соңғы турда жерлесі Ксения Балабаевадан басым түсіп, қосымша көрсеткіштер бойынша танымал ресейлік гроссмейстер Валентина Гунинаны артта қалдырды.

Жарыс нәтижесінде отандасымыз Алуа Нұрман – алтын, Валентина Гунина (FID) – күміс және Син Юйсинь (Қытай) – қола жүлдеге ие болды.

Сондай-ақ, сары құрлық додасында ел намысын қорғаған басқа да шахматшыларымыз Елназ Қалиахмет (5-орын), Ксения Балабаева (7-орын) және Лия Құрманғалиева (10-орын) үздік ондықтың қатарынан көрінді.