15.01.2025
Жеңімпаз атанған 100-ден астам спортшы Париж Олимпиадасы медалін қайтарып берді
Фото: dzen.ru
Соңғы төрт айдың ішінде 2024 жылғы Париж Олимпиадасы мен Паралимпиадасында жеңімпаз және жүлдегер атанған 100-ден астам спортшы сапасыз жасалған медалін ұйымдастыру комитетіне қайтарып берді. Бұл жөнінде La Lettre газеті жазды.
Спортшылар медальде бояуы түсіп, сапасы нашарлап кеткенін аңғарған. Сондықтан оны ұйымдастыру комитетіне қайтарып беруге шешім қабылдаған.
Әзірге қазақстандық спортшылар арасынан ондай қадамға барған ешкім жоқ.
Бұл туралы алдымен Францияның жергілікті спортшылары хабарлады. Олар Олимпиадада қол жеткізген медалінің түсі өзгергенін айтып шағымданды.
Париж Олимпиадасында Қазақстан құрамасы 1 алтын, 3 күміс, 3 қола медальға қол жеткізді. Медальдар кестесінде қазақстандықтар 43-орынмен аяқтады.
Қазақстандық спортшылар Олимпиада ойындарында спорттың 25 түрінен сынға түсті. Еліміздің атынан 80 спортшы 92 жолдама жеңіп алған болатын.
