Александр Бублик «Ролан Гаррос» турнирінің 1/8 финалына шықты

Қазақстанның бірінші ракеткасы Александр Бублик Франция астанасы Парижде өтіп жатқан «Ролан Гаррос» турнирінің төртінші айналымына шықты, деп хабарлайды Sport12.kz.

Жарыстың 1/16 финалында Бублик (АТР: 62) португалиялық Энрике Рошаны (АТР: 200) тізе бүктірді.

Грунт төсенішіндегі кортта өткен кездесу 1 сағат 43 минутқа созылды. Осы уақыт ішінде Бублик 9 эйс пен 5 брейк жасап, 6 мәрте қос қателікке бой алдырды. Нәтижесінде отандасымыз қарсыласынан 3:0 (7:5, 6:1, 6:2) есебімен басым түсті.

Енді еліміздің үздік теннисшісі келесі кезеңде британиялық Джек Дрейпермен (АТР: 5) ширек финал жолдамасын сарапқа салады.

Айта кетейік, «Ролан Гаррос» турнирінің жалпы жүлде қоры 56 352 млн еуроны құрайды. Ал Бублик төртінші айналымға жолдама алғаны үшін 265 000 еуро сыйақыға ие болды.