Александр Бублик Швейцариядағы ATP250 турнирінің финалына шықты

Қазақстандық теннисші Александр Бублик (ATP №34) Швейцарияның Гштаад қаласында өтіп жатқан ATP250 санатындағы турнирдің финалына жолдама алды, деп хабарлайды Sport12.kz

Жартылай финалда ол француз Артур Казоны (ATP №116) 6:1, 7:5 есебімен сенімді түрде жеңді.

Енді отандасымыздың финалдағы қарсыласы аргентиналық Хуан Мануэль Черундоло (ATP №109) болмақ. Аргентиналық спортшы соңғы 9 матчтың 8-інде жеңіске жетіп, қатарынан екінші финалына шықты. Өткен аптада ол Германияның Брауншвейг қаласында өткен Челленджер турнирінің финалында өнер көрсетті.

Финалға шыққаны үшін, Бублик 52 890 еуро көлемінде жүлде мен 165 рейтингтік ұпайды иеленді. Осы жетістігінің арқасында ол дүйсенбі күні қайтадан әлемдік рейтингтің ТОП-30 қатарына оралады.